Galicia, líder en vivendas baleiras

"Galicia sitúase á cabeza no Estado cun 18,6% de vivendas vacías respecto ao total de vivendas na comunidade. As provincias coa maior porcentaxe en toda España son Ourense e Lugo. E en Ribeira disparáronse en dez anos un 606,8%, segundo os datos do censo de 2011 publicados hoxe polo Instituto Nacional de Estatística.

 

Galicia é a primeira comunidade autónoma con maior porcentaxe de vivendas baleiras respecto ao total de vivendas e a cuarta en número total de domicilos vacíos, segundo os datos datos do censo de 2011 feitos públicos hoxe polo Instituto Nacional de Estatística (INE).

O número de vivendas baleiras en Galicia aumentou significativamente na primeira década deste século. Entre os anos 2001 e 2011, Galicia pasou de ter 229.360 domicilios vacíos a 299.396, é dicir, un total de 70.036 vivendas baleiras máis e un incremento porcentual do 8,7%, só superado por Andalucía (+18,5%), Comunitat Valenciana (+14,7%) e Cataluña (+13%). O número total destas vivendas en Galicia representa o 8,70% das que están baleiras en todo o Estado.

A comunidade galega lidera a porcentaxe de vivendas vacías respecto do total cun 18,6%, seguida d'A Rioxa (18%), Murcia (16,6%) e Catela-A Mancha (16,3%).

No número total de vivendas baleiras, Galicia, con 299.396, ocupa o cuarto posto, só superada por Andalucía (637.221), Comunitat Valenciana (505.029) e Cataluña (448.356). 

Hai que salientar que o noso país ten 36.117 vivendas baleiras máis que a Comunidade de Madrid, e que foi a segunda na que máis se incrementou o número total de vivendas vacías en dez anos, só superada por Andalucía, onde aumentaron en 88.552, é dicir, só 18.516 máis que en Galicia.

Por provincias 

As dúas provincias no Estado con maior porcentaxe de vivendas baleiras son Ourense, cun 22,7%, e Lugo, cun 20,2%. Tras estas sitúanse Castelló, cun 19,5%, e A Coruña, cun 18,6%. Pontevedra non aparece entre as 15 primeiras provincias desta clasificiación do INE.

Por número total de vivendas baleiras, entre as provincia galegas é A Coruña a que lidera a clasificación:

• A Coruña: 120.069 
• Pontevedra: 78.152 
• Ourense: 55.936 
• Lugo: 45.239 35.349 

Porcentualmente, entre as provincias galegas foi en Ourense onde máis medraron as vivendas baleiras entre os anos 2001 e 2011, un 61,65%, seguida de A Coruña (+29,85%), Lugo (+27,97%) e Pontevedra (+16,75%).

Por concellos

Entre os concellos galegos de máis de 20.000 habitantes, hai que salientar o espectacular crecemento porcentual de vivendas vacías en Ribeira, onde se dispararon un 606,8%. Tamén son importantes os incrementos en Vilagarcía de Arousa (83%), Cambre (72,3%), Ames (66,7%) e Ourense (45,5%). Pola contra, houbo unha importante caída na porcentaxe de vivendas baleiras en Carballo (-17,7%), A Estrada (-15,4%), Redondela (-8,1%) e Lugo (-7,3%).

 

Vivendas vacías vs desafiuzamentos

Os datos do INE son especialmente chamativos na conxuntura actual de crise económica e inmobiliaria, pero especialmente polos miles de desafiuzamentos que se están executando.

Nos últimos cinco anos, segundo datos do Consello Xeral do Poder Xudicial, executáronse en Galicia 6.483 desafiuzamentos, a inmensa maioría deles sobre vivendas, aínda que tamén hai casos nos que o ben afectado foi un baixo comercial, unha oficina ou outro tipo de inmoble. E só só durante o ano pasado 1.461 familias galegas (é dicir, catro cada día) perderon os seus fogares.

O número de familias con causas xudiciais abertas por non poder facer fronte á súa hipoteca vai en aumento. Segunda a mesma estatística, os xulgados galegos iniciaron o ano pasado 2.528 execucións hipotecarias, ou o que é o mesmo, procedementos mediante os cales os bancos esixen o pago das débedas garantidas por un contrato hipotecario. A cifra é un 26,2% superior á do ano anterior e representa máis do triple das execucións que se tramitaban en Galicia en 2007.

Esqueletes inmobiliarios en Galicia

A especulación inmobiliaria dos últimos anos deixou centos de vivendas abandonadas que murchan na paisaxe galega. En 2010, o Ministerio de Fomento cuantificaba o stock de vivendas novas por vender no Estado en 675.000, pero distintos organismos elevan a cifra a dous millóns. En Galicia non hai datos. A Xunta non os ten, nin os quere ter, pero nas paisaxes urbanas e semiurbanas, as fieiras de encostados habitados conviven con outros nos que as silveiras comezan a ser os únicos moradores. 

E hai casos espallados por toda a xeografía galega, como a urbanización Costa Miño Golf de Martinsa-Fadesa no pobo coruñés de Miño, Urbanización A Carballeira de Oleiros, a urbanización Solmiñor en Gondomar, urbanización no Castiñeiriño (Compostela), o "Miradoiro de Sales", en Vedra, a urbanizción no Val do Seixo no Concello da Merca e un longo etcétera.

Podes ollar unha fotogalería destas urbanizacións."       (Galicia Confidencial, 18/04/2013)