"Desde o 3 de maio o Movemento galego de Saúde Mental (MGSM) iniciou unha campaña de sensibilización e concienciación social arredor do suicidio. Unha problemática que atinxiu o pasado ano 324 persoas o que duplica o número de mortes por accidentes de tráfico. Unha cifra que, para alén do máis, non deixou de medrar desde 2010 pasando de 275 a 371 en apenas catro anos.
Por territorios, os dados fornecidos polo IMELGA e o
propio Movemento sitúan Lugo á cabeza do ránking de suicidios cunha
taxa en 2015 de 17,08 por cada 100 mil habitantes, fronte aos 11,85 da
media galega.
Neste senso, desde o MGSM advirten que "as políticas desenvolvidas
polo Goberno Central e a Xunta de Galiza fronte á crise desprotexeron a
sectores sociais vulnerábeis incrementando o risco de suicidio na
sociedade" e destacan como "especialmente importantes: a carencia de
políticas activas de emprego e un elevadísimo paro prolongado, a
redución da protección social, o deterioro da sanidade pública e en
particular o debilitamento da Atención Primaria de Saúde, a tolerancia
gobernamental coa banca e a súa agresividade respecto ao cobro dos
préstamos hipotecarios coa conseguinte vaga de desafiuzamentos".
Así as cousas, aclaran, "Galiza padeceu desde sempre elevadas taxas
de suicidio" o que sitúa o noso país no marco dun "grave problema de
saúde pública".
Eis a razón pola que o MGSM decidiu sensibilizar a poboación dando
visibilidade ás persoas mortas por suicidio através da campaña
Badaladas pola prevención coa que
reclaman a elaboración dun Plan galego de prevención do suicidio
através da creación dunha comisión técnica "capaz e críbel, cun
carácter multisectorial, articulado co necesario Plan Galego de Saúde
Mental, e dotado suficientemente" de recursos.
Badaladas pola prevención do suicidio concluíu esta quinta feira con
concentracións simultáneas en Ferrol, A Coruña, Lugo, Compostela,
Ribeira, Pontevedra, Cangas, Vigo e Ourense onde se escoitou unha
badalada coa que lembrar as persoas mortas. "
(Sermos Galiza, 01/07/16)
No hay comentarios:
Publicar un comentario